Ճարտարապետաշինարարական նախագիծը (այսուհետ Նախագծային փաստաթուղթ) քաղաքաշինական փաստաթուղթ է, որը մշակվում է Երևան համայնքի Գլխավոր հատակագծով և Գոտևորման նախագծերով հաստատված փաստաթղթերին համապատասխան Նախագծման թույլտվությամբ (ճարտարապետահատակագծային առաջադրանքով) և ՀՀ օրենսդրության ու նորմատիվատեխնիկական փաստաթղթերով սահմանված պահանջների ապահովմամբ: Ընդ որում, Շինարարության (ներառյալ Քանդման կամ Ապամոնտաժման) թույլտվությունը տրվում է նախապես մշակված նախագծային փաստաթղթերի հիման վրա:

Նախագծային փաստաթուղթը մշակվում է քաղաքաշինական գործունեության հետևյալ աշխատանքներն իրականացնելու նպատակով՝

բնակելի, հասարակական, արտադրական շենքերի և շինությունների (այդ թվում ոչ հիմնական) կառուցման, դրանց վերակառուցման (ներառյալ քանդման կամ ապամոնտաժման), վերականգնման և ուժեղացման,

քաղաքաշինական համալիրների և գործառնական տարածքների հատակագծման,

բարեկարգման և կանաչապատման:

Կառուցապատողին տրված Նախագծման թույլտվություն (ճարտարապետահատակագծային առաջադրանք) ստանալու պարագայում անհրաժեշտ Նախագծային փաստաթղթերի մշակման նպատակով համապատասխան լիցենզիա ունեցող նախագծային փաստաթղթեր մշակող կապալառուի (Նախագծողի) հետ պետք է կնքել նախագծային և հետազոտական աշխատանքների կապալի պայմանագիր:

Օրենքով սահմանված դեպքերում կամ կառուցապատողի հայեցողությամբ Նախագծողի ընտրությունը կարող է կատարվել նաև ճարտարապետական հրապարակային մրցույթների անցկացման միջոցով:

Նախագծային փաստաթղթերը, կախված նախագծվող օբյեկտի ռիսկայնության աստիճանից (կատեգորիայից), կարող են մշակվել մեկ` «Աշխատանքային նախագիծ» կամ երկու` «Նախագիծ» և «Աշխատանքային փաստաթղթեր» փուլերով՝ այդ թվում.

մեկ փուլով մշակվում են II և III ռիսկայնության աստիճանների (կատեգորիաների) դասակարգում ունեցող օբյեկտների նախագծային փաստաթղթերը, ինչպես նաև բազմակի օգտագործման օրինակելի նախագծերի եւ սերտիֆիկացված նախագծերի տեղակապման նախագծերը,

երկու փուլով` IV և V կատեգորիաների օբյեկտների նախագծային փաստաթղթերը։